简介

青衣站

青衣站（粤拼：cingjizaam；英文：Tsing Yi Station）系香港一个铁路站，喺青衣岛东北面，港铁东涌线同埋机场快线共用呢个站，亦系青衣岛唯一嘅铁路车站，服务岛上近20万居民。

车站结构

青衣站系个架空站，总共有6层，有4个侧式月台，全部月台都装上月台幕门。地面系私家车上客区、U1层系东涌线票务大堂、U2层系去香港站方向月台、U3层系阁楼、U4层系去东涌同机场/博览馆方向月台、U6层系停车场。各层都有扶手电梯连接，重有四部。而且，负责控制港铁观塘线、荃湾线、港岛线、东涌线、机场快线及将军澳线运作嘅车务控制中心（OCC），亦都喺入面。

车站楼层

青衣站

车站大堂

青衣站设有4个大堂，包括喺U1层嘅东涌线票务大堂、U4层连接青衣城F出口嘅东涌线大堂、U2层机场快线抵港月台大堂、以及U4层机场快线离港月台大堂。由於机场快线同东涌线设有两套独立收费系统，所以两条路线嘅月台同大堂唔可以互通，需要重新出入闸同埋经过车站大堂先可以往返两个月台。而U4层东涌线大堂更直接连接青衣城购物商场，因此由F出口大堂非收费区往返其他车站大堂嘅非收费区，需要经过青衣城，否则要经东涌线收费区往返其他大堂。而家东涌线嘅入闸机改咗喺U2层（东涌线往香港方向月台）。

车站商店及自助服务

青衣站内有唔同类型嘅商店，例如有面包糕饼店、时装店等零售业及医务所等服务。由於港铁收费区唔准饮食，因此大部份食肆都唔喺收费区内。

此外，青衣站有唔少自助服务设施，包括中国银行（香港）及恒生银行嘅自动柜员机、自动售卖机、自动照相机等。车站更设有香港邮政邮箱，方便乘客喺车站内寄信。另一方面，由於机场快线大堂为旅客而设，因此机场快线大堂嘅非收费区设有公众洗手间。

车站月台

青衣站设有4个侧式月台，1号同埋2号月台系机场快线月台，而3号同4号月台系东涌线月台，所有月台响启用前已经装上月台幕门。

喺月台排列上，1号月台（机场快线往机场或博览馆）同3号月台（东涌线往东涌或迪士尼线）位於车站最高一层－U4层，呢两个月台亦系港铁系统中海拔最高嘅月台；而2号月台（机场快线往香港）同4号月台（东涌线往香港）位於U2层。虽然机场快线同东涌线月台喺同一层，但每层两个月台中间嘅路轨有石屎墙分隔，所以尽管两条路线路轨并排排列，但系唔能够互望两边月台。